اورفيلام فى كل بيت
ربسم الله الرحمن الرحيم


افكاااااار للتوفير

استعرض الموضوع السابق استعرض الموضوع التالي اذهب الى الأسفل

افكاااااار للتوفير

مُساهمة  سهير احمد في الجمعة ديسمبر 14, 2012 8:50 pm


بالنسبة للمياة :


* وانتى بتغسلى اسنانك اقفلى الحنفية متسيبيهاش كدة شغالة عمال على بطال حرام

*وانتى بتاخدى الشاور بتاعك وبدأتى تعملى جسمك
بالليفة اقفلى المياة لحد م تخلصى براحتك خالص .. عايزة تبلى الليفة افتحى
شوية بليها وبعدين ارجعى اقفليها تانى


*بردو وانتى بتعملى البلسم اقفلى المياة لأنه
المفروض نسيبه على شعرنا دقيقة مثلا او اتنين والافضل تعملى البلسم وبعدين
تعملى بالليفة والبلسم على شعرك وبعدين تشطفى كله مع بعضه كدة توفير وقت
ومياة


*غسيل الاطباق : لو الحوض عندك بفتحتين يبقى الافضل
انك تفضى ناحية والاطباق وكل حاجة تغسليها بالصابون تحطيها كلها فيها كدة
لما تيجى تشطفى هتلاقى كله نزل عليه مياة بالمرة ومش هياخدو مياة كتير
وانتى بتشطفيهم خصوصا لو كانو كمية كبيرة

لو الحوض بفتحة واحدة حاولى تغسلى كل الاطباق بالصابون وتحطيهم ف الحوض وكدة بردو لما تيجى تشطفيهم كله هينزل عليه مياة.
******************************
بالنسبة للكهرباء :

* طبعا حاولى على قد م تقدرى تجيبى اللمبات الموفرة.

*الغرفة اللى محدش قاعد فيها نقفل الانوار بتاعتها والمراوح والاجهزة الكهربائية .

*السخان اول م تلاقى المياة خلاص سخنت وكله تمام اطفيه شوية ولما تحتاجية تانى ابقى شغليه

*الدفاية : لو شقتك برد اوووى الافضل تحطيها ف مكان
ف وسط الشقة مثلا الطرقة اللى بين الغرف بحيث توزع الحرارة على كل المنطقة
دى وبعدين تخرجيها ف الريسيبشن شوية تدفيه وبعدين اقفليها ... بلاش تخلى
الشقة سخنة اوووى لأن كدة ممكن تتعبى لو مثلا دخلتى البكونة او باب الشقة
او نزلتى ... خليها بس دافية


*لما تيجو تنامو افصلو الكهرباء عن كل الاجهزة لأنى
سمعت ف برنامج انه حتى وانتى قافلة التليفزيون او اى جهاز تانى بيكون فيه
دايرة كهربية شغالة جواه طوول م هو متوصل بالكهرباء .دة غير ان كدة أمان
لينا .


*لو التكييف شغال اقفلى ابواب الغرفة كويس علشان هو
بيبقى مخصص لمساحة معينة لو اكتر من كدة مع الوقت بيبوظ وكمان لو المساحة
اكبر منه بيشتغل بقوة مضاعفة وكمان مش بيبرد كويس.


*كمان حاولى طووول فرتة النهار تقفلى كل الانوار
وتفتحى الشبابيك اولا علشان تسمحى للشمس انها تدخل البيت والهوا كمان
وتغيرى جو البيت وثانيا توفير للكهرباء.


*متفتحيش باب التلاجة و الفريزر وتفضلى سايباهم كدة
فترة طويلة كدة بيسرب الفريون وتلاقى ان التلاجة بعدها بتشتغل بقوة مضاعفة
علشان تعوض درجة الحرارة اللى اتسربت وبالتالى بتسحب كهرباء اكتر وكمان مع
الوقت قوة التبريد بتاعتها هتضعف وهتلاقيها كونت تلج .


***************************
بالنسبة للأكل :

*اولا فى سوبرماركت كتيير بيعملو عروض زى المحمل
وكارفور ... انا معرفش فتح الله ايه نظامه بس ناس كتير بيشكرو فيه ...
المهم كل اول اسبوع ممكن تجيبو ورقة العروض دى وتشوفو ايه اللى انتو
محتاجينه فعلا وسعره حلو وتجيبوه.


*مثلا صلصة الطماطم لخضار ... انا بجيب علب الصلصة
الجاهزة ولما اجى اطبخ بضرب 3 ثمرة طماطم مثلا واضيف عليهم معلقة صلصة ...
يبقى كدة خدت الطعم واللون اللى انا عايزاه ( ملحوظة انا طبعا بعمل كميات
صغيرة علشان احنا اسرة صغنونة لسة يادوب فردين وزئردة صغيرة هههههه ) كل
واحدة ادرى طبعا بالكمية اللى تناسبها بس الكمية اللى بعميلها دى بتعمل نص
كيلو خضار اتفقنا ؟


*فى اوقات كدة سعر البصل والتوم بيبقى رخيص ...
هاتى كمية واضربيهم كلللللهم وحطى البصل ف اكياس كل كيس يا دوب على قد
الطبخة ... والثوم وانتى بتفرميه حطى عليه ملح علشان ميلزقش ف بعضه لما
يتجمد وحطيه كله ف برطمان مثلا وكل م تحتاجيه يادوب هتاخدى الكمية اللى
انتى عايزاها بالمعلقة حتى وهو متجمد

(ملحوظة تانية ... خلى بالك بقى لما تضيفى الثوم تعملى حساب الملح اللى فيه علشان الاكل ميكونش ملحه زايد)

*الطماطم كمان ف الوقت اللى بتكون رخيصة فيه هاتى صندوق مثلا واضربيهم كلهم وقسميه على اكياس على قد الطبخة وع الفريزر علطوووول.

*لو تقدرى كمان انك تجيبى الخضار ( ملوخية - قلقاس - بسلة وجزر - فاصوليا ) تسلقيهم نص سلقة وتشيليهم ف اكياس يبقى كتر خيرك.
******************************
بالنسبة للملابس :

*قبل كل موسم المحلات بتعمل تخفيضات على لبس الموسم
اللى قبله ... انتى بقى زى الشطورة كدة تنزلى ف وقت تخفيضات الصيف مثلا
... وتشترى كام طقم لأولادك ينفعهم ف الصيف اللى بعده .. على كام طقم ليكى
على كام قميص كدة لزوجك ... كمان محلات الشوز بيعملو تخفيضات هاتى كام
واحدة كدة حلوة لو محتاجة وشيليها للصيف ... بجد الموضوع بيفرق كتييير انا
لما كنت بجهز للزواج كان على حظى ف تخفيضات على الشتوى والله يا بنات
التونيك اللى كنت بشوفه ب 200 و اكتر لقيته ب 100 واقل كمان ... بينزلو
جااامد ف الاسعار وكمان لو دورتى كويس هتلاقى موديلات مثلا الصيف اللى قبله
عاملين عليها تخفيضات اكتر من 70% وبتبقى حاجات جميلة انتى بس دورى كويس وفاصلى هما بيبقو عايزين يخلصو من الحاجة ههههههههههههه


*اعملى نفس الكلام دة ف تخفيضات الشتوى
كدة هتلاقى انك جبتى هدوم حلوة وبأسعار معقولة بدل م الواحد بيشوف اسعار تصدمه

**************************
بالنسبة للغاز :

*وانتى بتطبخى لو الحاجة مش مستهلة انك تعلى النار يبقى حرام قللى النار عليها

*كمان متسيبيش النار شغالة كدة ع الفاضى لحد مثلا م تغسلى الرز او مش عارفة ايه لأ حرام.

*****************************
اضافة بس صغنون
الديتول كمان لما بجيبه بخفف شوية منه ف عبوة تانية وبستخدمه كدة ف التنضيف والمسح
كدة هتلاقى ان العبوة هتعيش معاكى وقت اطول

سهير احمد
Admin

عدد المساهمات : 840
تاريخ التسجيل : 24/07/2012
العمر : 35

http://oriflamehome.nicetheme.com

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى